കോഴിക്കോട്: വടകരയ്ക്കും മാഹിക്കും മധ്യേ പൂവാടന്‍ഗേറ്റിനു സമീപം റെയില്‍വെയുടെ കേബിള്‍ മുറിച്ചുമാറ്റിയതിനെത്തുടര്‍ന്ന് സിഗ്നല്‍ സംവിധാനം താറുമാറായി. ഇതേത്തുടര്‍ന്ന് ഏഴ് ട്രെയിനുകള്‍ വൈകി. സംഭവത്തില്‍ രണ്ട് അതിഥിത്തൊഴിലാളികളെ ആര്‍.പി.എഫ്. കസ്റ്റഡിയിലെടുത്തു. റെയില്‍വെയുടെ സിഗ്നല്‍വിഭാഗം സ്ഥലത്തെത്തി പത്തിന് കേബിള്‍ യോജിപ്പിച്ച്‌ സിഗ്നല്‍ സംവിധാനം പൂര്‍വസ്ഥിതിയിലാക്കി.
വെള്ളിയാഴ്ച രാവിലെ ആറിനാണ് സംഭവം. വടകരയ്ക്കും മാഹിക്കും ഇടയില്‍ സഗ്നല്‍സംവിധാനം പ്രവര്‍ത്തനരഹിതമായത്. തുടര്‍ന്ന് നടത്തിയ പരിശോധനയില്‍ പൂവാടന്‍ ഗേറ്റിലെ കേബിള്‍ മുറിച്ച നിലയില്‍ കണ്ടെത്തിയത്. കുറച്ച്‌ കേബിള്‍ നഷ്ടപ്പെട്ടിട്ടുണ്ട്. ഇവിടെ അടിപ്പാത നിര്‍മാണം നടക്കുന്നതിനാല്‍ കേബിള്‍ പുറത്താണുള്ളത്. കേബിള്‍ മുറിഞ്ഞതോടെ ട്രെയിനുകള്‍ക്ക് മുന്നോട്ടുപോകാനുള്ള സിഗ്നല്‍ കിട്ടിയില്ല. ഇതോടെ വണ്ടികള്‍ നിര്‍ത്തിയിട്ടു. വടകര സ്റ്റേഷന്‍ മാസ്റ്ററില്‍ നിന്ന് ലോക്കോ പൈലറ്റുമാര്‍ക്ക് മെമ്മോ എത്തിച്ചാണ് യാത്ര തുടര്‍ന്നത്.
